Valur bráðum 3ja mánaða

Valur Björn verður 3ja mánaða eftir viku og fór ég með hann til læknis í dag í eftirlit og bólusetningu. Litla skinnið mitt er orðið 8 kíló (7.950) og 65 cm. Læknarnir höfðu auðvitað aldrei séð jafn stórt 3ja mánaða gamalt barn og skoðuðu hann því á alla kanta og spurðu mig spjörunum úr um meðgönguna og ættarsöguna. Hann fékk líka fyrstu sprauturnar sínar, alls fjórar í lærin, og var hrikalega duglegur. Ég notaði tækifærið og spurði lækninn um skán sem hann hefur verið með á hausnum núna í 2 mánuði sem er að gera mig brjálaða (hart, hrufótt og hálf hvítt sem nær frá hvirfli niður á augabrúnir). Þetta er víst mjög algengt á ungabörnum og tengist einhverri offramleiðslu á fitu sem veldur því að dauða húðin dettur ekki af heldur festist á nýju húðinni (en samt lítur þetta út eins og rosalegur þurrkur). Ég hef sett á þetta olíu 1-2x á dag og greitt þetta úr með lúsakambi en þetta fer aldrei alveg og kemur svo alltaf aftur. Læknirinn benti mér á að fyrst það dugði ekki til að taka þetta ætti ég að nota á hann flösusjampó og reyna að ná þessu þannig. Ef þetta fer ekki með því fær hann sterakrem. Ég hef aldrei heyrt heima að notað sé flösusjampó á þetta...er ekki til spes krem á þetta sem notað er heima...minnir að einhver hafi verið að tala um það. Please látið mig vita ef þið þekkið þetta hvernig þetta hefur verið meðhöndlað heima ef olía hefur ekki virkað. Jæja alla vega, hann var hinn fínast þegar við komum heim og í allan dag en um kvöldmatinn fór hann að slappast eitthvað. Ég gaf honum því stíl en þá tók við 2ja tíma grátkast þar til hann datt útaf. Hann sefur enn og ég sit eiginlega yfir honum hér. Vona að þetta verði bara búið í fyrramálið!