Frá LA

Það er kannski orðið tímabært að koma með smá blogg. Hef ekkert skrifað í rúma 2 mánuði og hefur mikið gerst á þessum tíma. Ég og strákarnir skelltum okkur t.d. í rúmlega 5 vikna frí til Íslands þar sem ýmislegt var brallað. Veðrið var ekki alveg að gera sig fyrir okkur en það var gaman að hitta vini og vandamenn aftur. Við náðum samt eiginlega ekki að hitta alla sem við ætluðum að hitta og heimsækja en þannig er það bara þegar maður er einn að þvælast með 2 krakka gorma. Náði samt að fara á eitt djamm með Gallupsaumó, út að borða með Garðabæjarhópnum auk þess sem ég náði einum saumó með þeim líka, fara í bústaðinn með mömmu og pabba, hitta Junkó og Kobba, liggja í sundi með strákana, heimsækja þau oft í Lundi, hitta vini yfir hádegismat, kaffi og kvöldmat, heimsækja ættingja í bústað og fara í spa á Nordica svo eitthvað sé nefnt. Halldór Andri skemmti sér líka konunglega á Fróni, nóg að gera hjá honum á hverjum degi. Hann fór í Heilsuskóla, á fótboltanámskeið og á sundnámskeið. Lék við Önnu Maríu sína og Jónas frænda, fór í Húsdýragarðinn tvisvar, í annað skiptið til að hitta Mána vin sinn og í hitt skiptið til aðleika við Gallup afkvæmisbörn. Fór með ömmu sinni Hildi í hvalaskoðun, skellti sér í bústaðinn með hinu ömmu/afa settinu og svona má lengi telja. Hann var samt farinn að hlakka til að fara aftur út að hitta pabba sinn og var gott að sjá Atla aftur á flugvellinum í San Fran þar sem hann tók á móti okkur eftir maraþonflugið mikla. Flaug sem sagt ein með gormana frá Íslandi til San Fran (9tíma flug) í pakkfullri vél og var ekki með auka sæti fyrir Val. Að auki var þjónustan um borð með því ömurlegasta sem ég hef nokkuð tíman lent í í flugi. Það endaði með að ég bað flugfreyjuna sem var að þjónusta okkur þarna um að sækja fyrir mig aðra freyju til að tala við þannig að það kannski segir sína sögu....

Alla vega. Við gistum eina nótt í San Fran og fórum svo með flugi til LA morguninn eftir þar sem við ætlum að vera til 19. ágúst með Atla áður en við höldum heim á leið á Stanford kampusinn. Hitabyglgjan sem hér hafði verið að gera mönnum lífið leitt (og drepið um 100 manns) var yfirstaðin þegar við komum og var okkur mikið létt við það. Kominn þessi perfekt sumarhiti sem hér á að vera með sinni volgu hafgolu þannig að maður getur verið lítið klæddur úti án þess að vera heitt né kalt. Bara akkúrat svona perfekt hitastig. Við erum búin að gera hitt og þetta síðan við komum. Skelltum okkur á ströndina í Santa Monica, heimsóttum rosalegan botanical garð í Pasadena sem var æðislegt að sjá, rölta um svæðið og fara í garða hér í kring með krakkana, fórum í grillveislu hjá einum partnernum í vinnunni hjá Atla sem býr á Manhattan beach í 4 milljón dollara húsi (og við fengum sko guieded tour um húsið!). Ég fór með strákana á Getty safnið sem var mjög gaman og í gær skelltum við okkur svo í Wild life dýragarð nálægt San Diego. Í þessum skrifuðu erum við að gera okkur klár fyrir ströndina á Malibu þar sem við ætlum að spóka okkur um í dag. Sem sagt voða nóg að gera.

Læt þetta duga frá okkur í bili.